दुग्ध विकास संस्थानद्वारा उत्पादित दुध तथा दुधजन्य पदार्थको मूल्यमा छुट

काठमाडौं । सरकारले चाडपर्वलाई लक्षित गरेर दुग्ध विकास संस्थानद्वारा उत्पादित दुग्ध तथा दुग्धजन्य पदार्थको मूल्यमा छुट दिने भएको छ । कृषि तथा पशुपंक्षी विकास मन्त्रालयले सोमवार पत्रकार सम्मेलन गर्दै दुग्ध तथा दुग्धजन्य पदार्थमा प्रतिलिटर २ रुपैयाँदेखि सय रुपैयाँसम्म छुटको व्यवस्था गरिएको जानकारी गराएको हो ।

दशैँ, तिहार, छठलगायतका चाडपर्वलाई लक्षित गरेर दुग्ध विकास संस्थानले उत्पादन गरेका वस्तुहरु आम उपभोक्तालाई सहुलियत दरमा दिने निर्णय गरिएको मन्त्रालयले जनाएको छ ।

जस अनुसार प्रतिलिटर ९७ रुपैयाँ पर्ने स्टाण्डर्ड दुधको मूल्य २ रुपैयाँ घटाएर ९५ रुपैयाँ राखिएको छ । त्यसैगरी दहीको प्रतिलिटर २० रुपैयाँ, नौनी प्रतिकेजी १०० रुपैयाँ, घिउ प्रतिलिटर १०० रुपैयाँ, मिठाईमा प्रतिकेजी १० रुपैयाँ, याक चीज ५ सय ग्राममा ६० रुपैयाँ छुटको व्यवस्था गरिएको छ ।