अध्यक्ष ओली वास्तविक कम्युनिष्ट होइनन् : प्रधानमन्त्री

काठमाडौं । समाजवादी मोर्चाका नेताहरू एमालेका अध्यक्षप्रति आक्रामक देखिएका छन् । मोर्चाको सन्देशसभाका लागि कैलाली पुगेका उनीहरूले केपी ओलीलाई कम्युनिष्ट नै नभएको टिप्पणी गरे । मोर्चा तयार पार्दा ओलीलगायतको सातो गएको उनीहरूको प्रतिक्रिया छ ।

प्रधानमन्त्री तथा माओवादी केन्द्रका अध्यक्ष पुष्पकमल दाहालले एमालेको नेतृत्व वास्तविक कम्युनिष्टले नगरेको टिप्पणी गरेका छन् । समाजवादी मोर्चाले कैलालीको धनगढीमा सोमबार आयोजना गरेको सन्देश सभामा उनले केपी ओली संघीयतावादी र गणतन्त्रवादी नभएको आरोप लगाए । उनले ओलीले संविधान मिचेर संसद् विघटन गरेर्को र मुलुकलाई प्रतिगमनतर्फ लैजाने डरलाग्दो प्रयास गरेको नभुल्न आग्रह गरे ।

कार्यक्रममा नेकपा एकीकृत समाजवादीका अध्यक्ष तथा पूर्व प्रधानमन्त्री माधवकुमार नेपालले समाजवादी मोर्चा तयार गर्दा केहीको सातो गएको तर्क गरे । उनले वामपन्थी शक्तिलाई एक ठाउँमा ल्याउने उद्देश्यले समाजवादी मोर्चा गठन गरेको स्पष्ट पारे । मोर्चा गठन गर्दा कांग्रेसलाई वास्ता नभए पनि केहीको पेट पोलेको उनले गठबन्धनको सरकार पाँच वर्षसम्म चल्ने दाबी गरे ।

नेकपाका महासचिव नेत्रविक्रम चन्द विप्लवले नेपाली जनताको भविष्य समाजवादी मोर्चाको हातमा आएको बताए । उनले अब नेपाल समाजवादी मोर्चा नेपाली नागरिकको हकहितका लागि लड्ने दाबी गरे । भदौ २६ गते स्थगन गरिएको मोर्चाको सभा सोमबार गरिएको हो । कैलाली जाने क्रममा प्रधानमन्त्री दाहाललाई क्रान्तिकारी कम्युनिस्ट पार्टीका कार्यकर्ताले कालो झण्डा देखाएका थिए ।