इजरायल र हमासबीचको द्वन्द्व : इन्धन र पानीको अभावमा धेरै घाइते मर्न सक्ने सम्भावना  

काठमाडौं ।  इजरायल र प्यालेस्टिनी विद्रोही समूह हमासबीचको जारी द्वन्द्वका कारण  गाजा क्षेत्रमा मानवीय स्थिति बिग्रँदै गएको छ । विश्व स्वास्थ्य संगठन डब्लूएचओका अनुसार  २४ घण्टाका लागि मात्र पानी, बत्ती र इन्धन बाँकी रहेको छ ।

गाजा क्षेत्रका चिकित्सकले पनि गत आइतबार इन्धन र अन्य उपकरणको अभावमा धेरै घाइते मर्न सक्ने चेतावनी दिएका थिए । यही अक्टोबर ७ मा हमासले इजरायलमा आक्रमण गरेपछि इजरायलले पनि जवाफी कारबाही स्वरूप उत्तर गाजा क्षेत्रमा नाकाबन्दी गरेको हो, जसका कारण त्यहाँको जनजीवन कष्टपूर्ण बनेको छ । स्थानीय खानेपानी, विद्युत्, इन्धन र खाद्यान्न सामग्रीका लागि संघर्ष बाध्य छन् । अर्कोतर्फ इजरायलले उत्तरी गाजामा निरन्तर जसो मिसाइल आक्रमण गरिरहेको छ ।

बीबीसीका अनुसार सोमबार साँझसम्म इजरायलको आक्रमणमा गाजा क्षेत्रमा मर्नेको संख्या २ हजार ८ सयभन्दा बढी पुगेको छ । १० हजारभन्दा बढी घाइते भएका छन् ।