भारतको सहयोगमा इजरायलबाट उद्धार गरिएका १८ नेपाली आइपुगे दिल्ली

काठमाडौं । युद्धग्रस्त इजरायलबाट उद्धार गरीएका थप १८ जना नेपालीहरु भारत सरकारको ‘अपरेसन विजय’ अन्तर्गतको उद्धार उडानबाट नयाँदिल्ली आइपुगेका छन् । भारत सरकारले आफ्ना नागरिकको उद्धारका लागि पठाएको विशेष विमानबाटै नेपाली नागरिक पनि मंगलबार मध्यराति दिल्ली आइपुगेका हुन् ।

भारतका लागि नेपाली राजदूत शंकर शर्माले १८ जना नेपालीहरु भारत सरकारसँग समन्वयमा भारतको नयाँदिल्ली आइपुगेको जानकारी दिएका छन् । उनीहरुलाई राजदूत शर्माले नयाँदिल्लीमा स्वागत गरेका थिए । गत साता हमासले इजरायलमाथि आक्रमण गरेपछि त्यहाँ रहेका नेपाली नागरिकको उद्धारको प्रयास सरकारले थालेको हो । यसअघि नेपाल सरकारले विशेष विमान पठाएर २ सय ५४ जनाको उद्धार गरेको थियो ।

थप उद्धारका लागि नेपाल सरकारले भारत सरकारलाई आग्रह गरेको थियो । सो आग्रह बमोजिम भारत सरकारले आफ्ना नागरिकहरुसँगै १८ जना नेपालीलाई पनि उद्धार गरिदिएको हो ।