गोरखा दरबारबाट हनुमानढोकाका लागि पठाइयो फूलपाती

गोरखा । गोरखा दरबारस्थित दसैँघरबाट काठमाडौंको हनुमानढोका दरबारका लागि बाजागाजासहित र्‍याली निकाली फूलपातीसहितको डोली बिदाई गरिएको छ । विधिपूर्वक पूजाअर्चना गरी दरबारका सुसारेले आज बिहान ८ बजेको शुभसाइतमा फूलपातीसहितको डोली हनुमानढोका दरबारका लागि बिदाई गरेका हुन् ।

फूलपातीको डोली बा. २ झ २१२८ नम्बरको सरकारी गाडीमा राखेर हनुमानढोका दरबार ल्याइएको छ । आज साँझ हर्षबढाइँका साथ हनुमानढोका दरबारमा फूलपाती भित्र्याइनेछ । गोरखा दरबारको दसैँघरमा पनि आजै साँझ फूलपाती भित्र्याइन्छ ।

तत्कालीन गोरखाका राजा पृथ्वीनारायण शाहले काठमाडौंको हनुमानढोका दरबारबाट राजकाज सुरू गरेदेखि बर्सेनि बडादसैँको सातौं दिन गोरखा दरबारको दसैँघरबाट फूलपातीसहितको डोली काठमाडौँको हनुमानढोका दरबारमा पुर्‍याएर भित्र्याउने प्रचलन रहँदै आएको छ ।