दसैँमा उपत्यकाका अस्पतालले कसरी दिँदैछन् सेवा ?

काठमाडौं । राष्ट्रिय ट्रमा सेन्टरले दसैँको समयमा आकस्मिक सेवा नियमित सञ्चालन हुने भएको छ । ट्रमा सेन्टरमा धेरैजसो बिरामी आकस्मिक सेवाका लागि आउने भएकाले निरन्तर रूपमा आकस्मिक सेवा दिइएको सेन्टरका प्रशासन शाखाले जनाएको छ ।

यता मीनभवनस्थित सिभिल अस्पतालले पनि दसैँ बिदाको समयमा आकस्मिक सेवा नियमित रूपमा सञ्चालन गर्ने भएको छ । सप्तमीदेखि दशमीसम्म ओपीडी सेवा बन्द रहने अस्पतालले जनाएको छ । तर, आकस्मिक सेवा र इन्डोर सेवा खुला रहने भएको छ । दसैँमा बढी मात्रा चिल्ला, पिरो, मसलादार खानेकुरा र माछा मासु, रक्सी खाएर झाडापखाला, बान्ता भई अस्पतालमा बिरामी बढी हुने भएकाले सोही अनुसार अस्पतालमा जनशक्ति व्यवस्थापन गरिएको जनाइएको छ ।

त्यसै गरी पाटन अस्पताल, त्रिवि शिक्षण अस्पताल, वीर अस्पताल, गङ्गालाल राष्ट्रिय हृदय रोग उपचार केन्द्र र कान्ति बाल अस्पतालमा पनि दसैँ बिदा अवधिमा आकस्मिक सेवा २४ घण्टा खुला रहेको अस्पतालले जनाएको छ । अस्पतालका अनुसार सप्तमी अर्थात् फूलपातीदेखि पाँच दिनसम्म ओपीडी सेवा बन्द रहने छन् ।

यद्यपि यस अवधिमा भर्ना भएका बिरामीको उपचारमा भने निरन्तर खटिने जनाइएको छ । यो समय सडकमा ट्राफिक जाँच कम हुने हुँदा रक्सी सेवन गरी सवारी चलाउँदा दुर्घटना बढ्छ । त्यस्तै मीठो मसिनो खाने भनेर चिल्लो, पिरो, अमिलो, माछा, मासु र रक्सी बढी मात्रा खाँदा धेरै बिरामी भएर अस्पताल आउने गर्दछन् ।