आज बडादशैँको आठौँ दिन : माता दुर्गा भवानीको पूजा आराधना गरी महाअष्टमी पर्व मनाइँदै

काठमाडौं  । आज बडादशैँको आठौँ दिन । आश्विन शुक्ल अष्टमीका दिनमा मनाइने महाअष्टमी पर्व आज मुलुकभर  नेपालीहरूले बडादशैँका रूपमा दुर्गा भवानीको विशेष पूजा आराधना गरी  महाअष्टमी पर्व   भव्य रूपमा मनाउँदै छन् ।

बडादसैँको आठौँ दिन आज महाकाली, महालक्ष्मी र महासरस्वतीको विशेष पूजा आराधना गरिन्छ । महाअष्टमीको दिन दुर्गा भवानीलाई शक्तिशाली बनाउने दिन भएकाले यसको विशेष महत्त्व रहेको विभिन्न वैदिक सनातन परम्पराका ग्रन्थमा उल्लेख गरिएको छ ।   आजको दिन दसैँ घर र कोतलगायत देशका विभिन्न शक्ति पीठमा बलिसहित पूजा अर्चना तथा दुर्गा सप्तशती पाठ गर्ने परम्परा छ ।

काठमाडौं उपत्यकाभित्रका दक्षिणकाली, गुह्येश्वरी, मैतीदेवी, कालिका स्थान, नक्साल भगवती, भद्रकाली, शोभा भगवती, विजेश्वरी, इन्द्रायणी, रक्त काली, बज्रयोगिनी, सङ्कटा, बज्र वाराहीलगायतका मन्दिरहरूमा बलि चढाउने र पूजा आराधना गर्नेहरूको बिहानदेखि घुइँचो लाग्ने गर्छ । यसै गरी, राजधानी बाहिर काभ्रेको पलान्चोक भगवती र बनेपाको चण्डेश्वरी, गोरखाको मनकामना, वीरगन्जको गहवामाई, सप्तरीको छिन्नमस्ता भगवती, जनकपुरको राजदेवी, डडेलधुराको उग्र तारालगायतका मन्दिरहरूमा शक्ति रूपा भगवतीको पूजा अर्चना गर्ने प्रचलन छ ।

आज दसैँ घर तथा जमरा कोठामा दुर्गा भवानी, महाकाली, महासरस्वती र महालक्ष्मीको प्रतीकका रूपमा चामल, द्रव्य, जनै, सुपारी, फलफूल र नैवेद्यसहित नौ थुप्रा राखी दुर्गापूजा गर्नाका साथै फलामबाट बनाइएका हातहतियार र सवारी साधनलाई सफा सुग्घर गरी बलिसहित पूजा गरिन्छ । पशु बली नचढाउनेहरू आजको दिन जमरा कोठामा घिरौँला, कुभिन्डो, मूला आदि बलि दिई दुर्गा भवानीलाई खीर तथा नरिवल चढाउने गर्दछन् ।

हनुमान ढोकाको दसैँ घरमा आज मध्यरातमा शक्ति रूपिणी दुर्गा भवानीको पूजा अर्चना र हर्ष बढाइँका साथै ५४ राँगा र ५४ बोकाको बलि दिई कालरात्रि मनाउने चलन छ । ब्राह्मणका लागि भने पशु बलि वर्जित गरिएको छ । आसुरी प्रवृत्तिको नाश गर्न देवीलाई शक्तिशाली बनाई पशुको मुक्तिका लागि पनि पशु बलिको महत्त्व रहेको धर्मशास्त्रविद्हरूको भनाइ छ ।