सुरक्षा सतर्कता अपनाउन आफ्ना नागरिकलाई इजरायलस्थित नेपाली दूतावासको आग्रह

काठमाडौं । लेबनानसँगको सीमा क्षेत्रबाट आक्रमण सुरु भएको भन्दै इजरायलस्थित नेपाली राजदूतावासले थप सुरक्षा सतर्कता अपनाउन नेपालीहरूलाई आग्रह गरेको छ।

दूतावासको अनुसार इजरायलको दक्षिणी क्षेत्रको अशान्तिसँगै उत्तरी क्षेत्र लेबनानसँगको सीमा क्षेत्रबाट समेत इजरायलमाथि रकेट तथा मिसाइल आक्रमण प्रहार बढिरहेको छ । दूतावासले उक्त क्षेत्र आसपास बस्ने नेपालीहरूलाई आफ्नो क्षेत्रका लागि जारी गरिएका सूचनाबारे तथा आफ्नो सुरक्षातर्फ सचेत रहन अनुरोध गरेको छ । सुरक्षित नहुँदा र विभिन्न तरिकाले समस्यामा परेमा दूतावासलाई जानकारी गराउन अनुरोध गरिएको छ ।

दूतावासले इजरायलमा रहेका नेपालीहरुको सुरक्षाप्रति आफू गम्भीर रहेको बताएको छ । इजरायलमा रहेका सम्पूर्ण नेपालीहरूलाई दूतावासको वेबसाइटमा राखिएको तथ्याङ्क सङ्कलन फर्म अनिवार्य भर्न दूतावासले अनुरोध गरेको छ । फर्म भर्न अप्ठ्यारो हुनेलाई दूतावासमा सम्पर्क गर्न अनुरोध गरिएको छ।