इजरायलबाट ल्याइएको चार नेपालीको शव धनगढी लगियो

काठमाडौं । इजरायलबाट आज नेपाल ल्याइएको चार नेपालीको शव सेनाको हेलिकप्टरमार्फत धनगढी पठाइएको छ ।

प्यालेस्टिनी विद्रोही समूह हमासको आक्रमणमा परी इजरायलमा ज्यान गुमाएका १० जना नेपाली विद्यार्थीमध्ये चार जनाको शव आज नै काठमाडौं आइपुगेको थियो ।

फ्लाई दुबईको विमानमार्फत उनीहरूको शव नेपाल ल्याइएको परराष्ट्रमन्त्री नारायणप्रकाश साउदका प्रेस संयोजक केशव साउदले जानकारी दिए । उनका अनुसार अहिलेसम्म दार्चुला मालिकार्जन–४ का लोकेन्द्रसिंह धामी, दार्चुला लेकम–५ का दीपेशराज विष्ट, कैलाली घोडाघोडी–४ का नारायणप्रसाद न्यौपाने र कैलाली बौनियाँ–३ का आशिष चौधरीको शव नेपाल आइपुगेको हो ।

न्यौपानेको शव गएराति आइपुगेको थियो भने धामी र विष्टको शव आज बिहान आइपुगेको हो । चौधरीको शव आज दिउँसो २ बजेर ४० मिनेटमा नेपाल ल्याइएको परराष्ट्र मन्त्रालयले जनाएको छ ।

गएको असोज २० गते हमास समूहको आक्रमणमा परी इजरायलमा १० जना नेपाली विद्यार्थीको ज्यान गएको थियो । सुदूरपश्चिम विश्वविद्यालयको कृषि क्षेत्रको ’लर्न एन्ड अर्न’ कार्यक्रमअन्तर्गत उनीहरू इजरायल गएका थिए ।

उनीहरू गएको भदौ १८ र १९ गते प्रयोगात्मक सिकाइका लागि ११ महिनाको ’लर्न एन्ड अर्न’ कार्यक्रमअन्तर्गत इजरायल पुगेका थिए । आक्रमणमा परी मृत्यु भएका बाँकी छ जना नेपाली विद्यार्थीको शव पहिचान गर्ने र कानुनी प्रक्रिया पूरा गर्ने क्रममा रहेको छ भने कञ्चनपुर भीमदत्त–३ का विपीन जोशी सम्पर्कविहीन छन् ।