बडादशैँले आपसी सद्भावअभिवृद्धि गर्छ : पूर्वराष्ट्रपति भण्डारी

काठमाडौं । पूर्वराष्ट्रपति विद्यादेवी भण्डारीले सम्पुर्ण नेपालीहरुलाई दशैँको शुभकामना दिएकी छन् । उनले एक सन्देश मार्फत बडादशैँले परिवार, समाज र राष्ट्रलाई नै भावनात्मकरूपमा एक बनाएको बताएकी छन् ।

बडादसैँले विविधतायुक्त नेपाली समाजमा आपसी सद्भाव र सहिष्णुता अभिवृद्धि भई राष्ट्रिय एकता सुदृढ बनाउन सहयोग पुग्ने विश्वास गरेकी हुन् । उनले शुभकामना सन्देशमा भनिन्’देशविदेशमा छरिएका परिवारका सदस्यबिचको पुनर्मिलनका साथै मान्यजनबाट टीका ग्रहण गरी आशीर्वाद लिनेजस्ता मौलिक परम्पराले गर्दा बडादशैँले परिवार, समाज र राष्ट्रलाई नै भावनात्मक रूपमा एक बनाएको छ,’।

असत्यमाथि सत्य र अन्यायमाथि न्यायको विजयको प्रतीकका रूपमा मनाइने बडादसैँ पर्वको आर्थिक र सामाजिक पक्षसमेत उत्तिकै महत्त्वपूर्ण रहेको उल्लेख गर्दै पूर्वराष्ट्रपति भण्डारीले मान्यजनबाट टीका र जमरासहित आशीर्वाद लिने पर्वका रूपमा दसैँले हाम्रो असल सांस्कृतिक परम्परालाई निरन्तरता दिँदै आएको बताइन् ।