अनुहार होइन प्रमाण हेरेर काम गर्न प्रहरीलाई गृहमन्त्रीकाे निर्देशन 

काठमाडौं । उपप्रधानमन्त्री एवं गृहमन्त्री रवि लामिछानेले हरेक नागरिकले सुरक्षाको अनुभूति हुने गरी सेवा प्रवाह गर्न प्रहरीलाई निर्देशन दिएका छन् ।

आज नेपाल प्रहरी प्रधान कार्यालयको निरीक्षण भ्रमणपछि आयोजित कार्यक्रमा गृहमन्त्री लामिछानेले कुनै घटनाका प्रतिवादी आदेशका आधारमा नभई प्रमाणका आधारमा बनाउन निर्देशन दिएका हुन् ।

‘कुनै पनि घटना तथा अपराधको छानबिन र अनुसन्धान हुँदै गर्दाको प्रतिवादी हुने वा नहुने निर्धारण आदेशले होइन प्रमाणले गर्नुस्’, उनले भने, ‘अनुसन्धान प्रमाणमुखी हुनुपर्दछ र कानुनको नजरमा सबै बराबर हुनुपर्दछ ।’

उनले अनुहार, पद, प्रतिष्ठा हेरेर नभई प्रमाणका आधारमा निष्पक्ष भएर अनुसन्धान तथा कारबाही अघि बढाउन प्रहरीलाई आग्रह गरे । उनले संगठन निर्माण र उच्च छवि बनाउन योगदान दिने सम्पूर्ण पूर्वप्रहरी अधिकृत र बहालवाला प्रहरी अधिकृत तथा जवानप्रति  सम्मानसमेत प्रकट गरे ।