सिरहाको कल्याणपुर नगरपालिकाकी उपमेयरले गरिन् सरकारी गाडीको दुरुपयोग

काठमाडौं । सिरहाको कल्याणपुर नगरपालिकाकी उपमेयर रेखा यादवले सरकारी गाडीको चरम दुरुपयोग गरेको पाइएको छ ।

नगरपालिकाले कार्यलयको कामकाजमा सहजताका लागि उपलब्ध गराएको प्रदेश २-९०२००१ झ ००३६ नम्बरको स्कोर्पियो गाडी उपमेयर यादवले आफ्नो निजी काममा प्रयोग गरेको पाइएको हो ।

कार्यालयमा बेलाबखत देखा पर्ने उपमेयर यादव स्कोर्पियो गाडी लिएर निजी काममा व्यस्त  हुन्छिन् । उपमेयर यादव साथै उक्त गाडी उनका श्रीमान् अजय यादवले समेत प्रयोग गर्दै आएका छन् ।

सोमबार सार्वजनिक बिदाको दिन उक्त गाडी जनकपुरमा भेटियो । सञ्चारकर्मीको समूहले पछ्याउँदै जाँदा उपमेयरका श्रीमान गाडी लिएर आएका थिए । जनकपुरस्थित आरजी होटेलमा कल्याणपुरबाटै गएको जन्तीमा बिहेका सामग्री लोड गरी उनी त्यहाँ गएका थिए । उनी जनकपुर जाँदा बाटोमा  कयौँ प्रहरी र ट्राफिक कार्यालय पार गरे । तर, कसैले केही गरेनन् ।

यो त उदाहरण मात्रै हो, उपमेयर र उनका श्रीमानले सरकारी गाडीको चुनाव जितेदेखि नै चरम दुरुपयोग गर्दै आएका थिए । स्थानीयले निरन्तर रूपमा विरोध गर्दा समेत कसैको ध्यान पुग्न नसकेको अवस्था छ । सरकारी गाडीको दुरुपयोग गर्नेलाई कानुनी कारबाहीको व्यवस्था भएता पनि सम्बन्धित नियामक निकाय र सरोकारवाला  यस विषयमा मौन बसिरहेका छन्  ।

त्यसैले सम्बन्धित पक्षले आवश्यक छानबिन गरि कानुनी दायरामा ल्याउन पहल गर्न जरुरी देखिन्छ ।