पाँच दलीय कार्यदलको बैठक बस्दै

काठमाडौं । सरकारको आगामी साझा नीति तथा कार्यक्रमको प्राथमिकता छनोटका लागि गठित पाँच दलीय कार्यदलको बैठक बस्ने भएको छ ।

बैठक सिंहदरबारस्थित अर्थ मन्त्रालयमा दिउँसो ४ बजे बस्ने भएको हो । फागुन २१ गते नयाँ सत्ता समीकरण बनेसँगै गठबन्धनका पाँच दलबाट दुई-दुई जना सदस्य रहने गरी फागुन २७ गते कार्यदल गठन भएको थियो ।

बैठकमा विभिन्न दलबाट आएका सुझावलाई समेटेर ड्राफ्ट तयार गर्ने कार्यदलका सदस्य मनिष सुमनले जानकारी दिए । ‘गठबन्धन दलबाट आएका सुझाव समेटेर आज ड्राफ्ट तयार हुन्छ । प्रतिवेदन आजै बुझाउने वा नबुझाउनेबारे अहिले निष्कर्षमा पुगेकाे छैन ।’

कार्यदलको संयोजक एमालेका उपाध्यक्ष विष्णुप्रसाद पौडेल रहेका छन् । सदस्यमा एमालेका उपमहासचिव विष्णु रिमाल, माओवादीबाट अर्थमन्त्री एवं उपमहासचिव वर्षमान पुन, उपमहासचिव जनार्दन शर्मा रहेका छन् ।

रास्वपाबाट उपसभापति डा. स्वर्णिम वाग्ले, महामन्त्री डा.मुकुल ढकाल, जसपाबाट नेता सुमनसहित वरिष्ठ नेता राजेन्द्र श्रेष्ठ रहेका छन् । एकीकृत समाजवादीबाट उपाध्यक्ष प्रमेश हमाल र महासचिव घनश्याम भुसाल रहेका छन् ।