सुन तस्करी प्रकरणमा पूर्वसभामुख महरालाई मुद्दा चलाउन सिफारिस

काठमाडौं । सुन तस्करी प्रकरणमा जोडिएका पूर्वसभामुख तथा माओवादी केन्द्रका उपाध्यक्ष कृष्णबहादुर महरालाई मुद्दा चलाउन सिफारिस गरेकाे छ ।

सुनको अवैध पैठारी (तस्करी) नियन्त्रण सम्बन्धी जाँचबुझ आयोगले पूर्वसभामुख महरालाई मुद्दा चलाउन सिफारिस गरेको हो ।

सुन तस्करीबारे छानबिन गर्न गठित जाँचबुझ आयोगका अध्यक्ष डिल्लीराज आचार्यले बिहीबार गृहमन्त्री रवि लामिछानेलाई प्रतिवेदन बुझाएका थिए ।

इलेक्ट्रिक चुरोट भेपमार्फत गरिएको सुन तस्करीमा महराको संलग्नता देखिएको जाँचबुझ आयोगको ठहर छ ।

६० किलो सुन हङकङबाट र भेपमा लुकाएर दुबईबाट काठमाडौंमा सुन तस्करी भएको थियो । गत असोज १४ मा मन्त्रिपरिषद्ले सुनको अवैध पैठारी (तस्करी) नियन्त्रण सम्बन्धी जाँचबुझ आयोग गठन गरेको थियो ।

आयोगको सदस्यमा पूर्व सहसचिव किशोरजंग कार्की,पूर्व प्रहरी अतिरिक्त महानिरीक्षक सहकुलबहादुर थापा र पूर्व सहसचिव प्रेमराज जोशी थिए ।