रोजगारीको सिलसिलामा एक महिनामा विदेशिए साढे ६५ हजार नेपाली

काठमाडाैं । रोजगारीको सिलसिलामा एक महिनामा साढे ६५ हजार नेपाली विदेशिएका छन् ।

वैदैशिक रोजगार विभागको तथ्यांक अनुसार अघिल्लो महिना फागुनमा ६५ हजार ६५८ जनाले नयाँ तथा पुनः श्रम स्वीकृति लिएका छन् । यससँगै चालु आर्थिक वर्ष २०८०/८१ आठ महिनामा नयाँ तथा पुनः श्रम स्वीकृति लिने नेपालीको संख्या ४ लाख ७१ हजार २ सय १० पुगेको छ ।

नेपालबाट हरेक दिन औसत २ हजार नेपाली काम खोज्दै विदेशिने गरेका छन् । फागुनमा काम खोज्दै विदेशिनेमध्ये ६ हजार ७ सय ६८ महिला छन् । पछिल्लो तीन महिनायता लगातार ६० हजारभन्दा माथिको संख्यामा नेपाली विदेशिएको तथ्यांकमा देखिन्छ ।

फागुन २०८० मा काम खोज्दै विदेशिने नेपाली अघिल्लो वर्ष सोही महिनाको तुलनामा केही बढी हो । अघिल्लो वर्ष फागुनमा ६१ हजार ८ सय ४५ नेपाली विदेशिएका थिए ।

तथ्यांक अनुसार यो वर्ष आठ महिनामा पौने ५ लाख नेपाली विदेशिएका छन् । यो अघिल्लो वर्षको सोही अवधिको तुलनामा भने केही कम हो । अघिल्लो वर्ष आठ महिनामा ५ लाख ४० हजार ६ सय ७५ नेपाली विदेशिएका थिए