भारतीय नागरिकलाई म्यान्मा छाड्न भारतीय विदेश मन्त्रालयको निर्देशन

काठमाडाैं । म्यान्माको रखाइन राज्यको बिग्रँदो सुरक्षा स्थितिबीच भारतको विदेश मन्त्रालयले सम्पूर्ण भारतीय नागरिकलाई उक्त स्थान खाली गर्न निर्देशन दिएको छ ।

शुक्रबार पत्रकार सम्मेलनको आयोजना गर्दै मन्त्रालयका प्रवक्ता रणधीर जैसवालले रखाइन राज्यको अवस्था नाजुक बन्दै गइरहेको भन्दै त्यहाँका भारतीय नागरिकलाई यथाशीघ्र उक्त ठाउँ छाड्न र क्षेत्रमा यात्रा नगर्न निर्देशन दिएका छन् । रखाइन राज्यमा निरन्तर द्वन्द्व भइरहेकाले सुरक्षा स्थिति प्रतिकूल रहेको उनले जनाए ।

गत फेब्रुअरीमा भारत सरकारले बिग्रँदो सुरक्षा स्थितिकाबीच रखाइन राज्यमा यात्रा नगर्न सल्लाह दिँदै सम्पूर्ण भारतीय नागरिकमा निर्देशन जारी गरेको थियो । बिग्रँदो सुरक्षा स्थिति, दूरसञ्चार साधनको अवरोध र अत्यावश्यक वस्तुको चरम अभावका बारेमा प्रकाश पार्दै मन्त्रालयले रखाइन राज्यमा बसोबास गरिरहेका भारतीय नागरिकलाई तत्काल उक्त स्थान खाली गर्न निर्देशन दिएको हो ।

हाल म्यान्मामा हिंसाका घटना बढिरहेका छन् । गत अक्टोबरमा तीन जातीय अल्पसंख्यक शक्तिले आक्रमण गरेर केही सहर र सैनिक चौकी कब्जामा लिएपछि हिंसाका घटना बढेका हुन् ।